Раённая газета ўжо двойчы за апошнія месяцы асвятляла пытанні стварэння сацыяльнага кафэ «Срэбраны ўзрост» для пажылых і людзей з абмежаванымі магчымасцямі. І вось адбылося яго ўрачыстае адкрыццё.
29 снежня, адразу пасля 14.00 ля будынка магазіна «Гурман», што на вуліцы Камуністычнай, на супрацьлеглым баку ад уваходу ў тэрытарыяльны цэнтр сацыяльнага абслугоўвання насельніцтва сабраўся зацікаўлены падзеяй натоўп. Начальнік упраўлення па працы, занятасці і сацыяльнай абароне райвыканкама Вячаслаў Бялько адзначыў, што ў Міёрах з’явіўся не зусім звычайны аб’ект: пад шыльдай кафэ знаходзіцца школа камп’ютарнай граматнасці для тых, хто імкнецца набыць навыкі па карыстанні сучаснымі тэхналогіямі.
Таму «Срэбранаму ўзросту» проста наканавана стаць папулярным. І перадаў сімвалічны ключ кіраўніку раённай ветэранскай арганізацыі Беларускага грамадскага аб’яднання ветэранаў Чаславу Кашкуру. Той пацвердзіў, што добрая справа – плён намаганняў і працы многіх. Так, ідэя ўключыцца ў конкурс мясцовых ініцыятыў у рамках праекта «Разам для грамады і прыроды: Міёрскі раён» зыходзіць ад спецыялістаў тэрытарыяльнага цэнтра, якія ведаюць актуальныя праблемы і патрэбы людзей пэўнай катэгорыі грамадзян з уласнага вопыту. Ветэранская пярвічка задуму падтрымала, узначаліла ініцыятыву і актыўна ўдзельнічала ў ёй.
Аднак увасобілася ў жыццё яна дзякуючы падтрымцы кіраўніцтва ўпраўлення па працы, занятасці і сацыяльнай абароне і яго падраздзялення – ТЦСАНа. Непасрэдна над рэалізацыяй праекта найбольш працавалі загадчык аддзялення дзённага знаходжання для грамадзян пажылога ўзросту і суправаджальнага пражывання Ганна Ліскова, спецыялісты Юлія Машара і Вольга Рачыцкая. Ініцыятыва рэалізуецца пры фінансавай падтрымцы Еўрапейскага саюза. Агульныя намаганні дазволілі атрымаць грант у 10 тысяч еўра, якія выкарысталі на стварэнне сацыяльнага кафэ.
Пасля невялікай урачыстасці і прадстаўлення перад дзвярыма, за якімі не так даўно знаходзілася працоўная майстэрня для інвалідаў, пачалася агульная экскурсія ў новую ўстанову. Кафэ – гэта ўжо абноўленае памяшканне плошчай каля 25 – 30 квадратных метраў, адна частка якога – камп’ютарны клас, другая – невялікі кафетэрый для адпачынку. На пяці сталах устаноўлены ноутбукі, яшчэ на адным – прынтар і смартфон. Для наведвальнікаў кафэ падрыхтаваны месцы за столікамі. Набыта кавамашына, а таксама мікрахвалёўка і іншае абсталяванне.
Памяшканне адрамантавана. Як выказаў спадзяванні Вячаслаў Анатольевіч, яго дэкорам зоймуцца будучыя «вучні» і наведвальнікі.
ДЛЯ «Срэбранага ўзросту» галоўнае ўсё ж камп’ютарнае абсталяванне. Ініцыятыўных грамадзян навучаць з дому аплачваць камунальныя паслугі, запісвацца на прыём да ўрача, заказваць пакупкі ў інтэрнэце ці білеты на грамадскі транспарт, мець зносіны ў сацыяльных сетках і многае іншае.
Пакуль адны ўдзельнікі ўрачыстасці знаёміліся з абсталяваннем і асвойвалі кафэ, іншыя ўжо працавалі ў зале на другім паверсе будынка ТЦСАНа. Ганна Ліскова і Юлія Машара вырашалі практычныя пытанні з першым дзясяткам будучых навучэнцаў. Дарэчы, імі аказаліся толькі жанчыны-пенсіянеркі. Найперш яны запоўнілі анкеты для высвятлення ўзроўню камп’ютарнай падрыхтоўкі. Потым сфарміравалі дзве вучэбныя групы з пяці чалавек кожная. Дамовіліся, што заняткі будуць праходзіць па аўторках і чацвяргах на працягу дзвюх гадзін для адной групы з раніцы, для другой – пасля абеду.
Выкладчык-эксперт Кацярына Шульга і яе памочнікі-валанцёры падабраны, дадаткова ў гэтай якасці будуць далучацца вучні-старшакласнікі. Таксама плануюцца іншыя мерапрыемствы па інтарэсах. Выказана агульнае пажаданне найперш сустрэцца з работнікамі банка, каб даведацца пра бяспеку фінансавых аперацый. Потым будуць гутаркі з медыкамі, пакуль не ўтаймаваны каронавірус, супрацоўнікамі аддзелаў па надзвычайных сітуацыях і ўнутраных спраў.
У адкрыцці сацыяльнага кафэ прынялі ўдзел прадстаўнікі іншых ініцыятыў. Кіраўнік «Распісных пернікаў Міёршчыны» Ксенія Маскаленка прыгатавала для гасцей салодкія падарункі.
Леанід МАТЭЛЕНАК
Фотаматэрыял Казіміра БЛАЖЭВІЧА